ലെയിൻ ട്രാഫിക്കിൽ വാഹനങ്ങൾ ഓടിക്കേണ്ട സുരക്ഷിതശീലങ്ങളെപ്പറ്റി
മോട്ടോർ വെഹിക്കിൾസ് (ഡ്രൈവിംഗ്) റെഗുലേഷൻസ് 2017 ലെ ക്ലോസ് 2, 6 കളിലാണ് പ്രധാനമായും ലെയിൻ ട്രാഫിക്കിൽ വാഹനങ്ങൾ ഓടിക്കേണ്ട സുരക്ഷിതശീലങ്ങളെപ്പറ്റി പ്രതിപാദിച്ചിരിക്കുന്നത്.
ക്ലോസ് 2(b) പ്രകാരം വാഹനങ്ങൾ സുഗമമായും സുരക്ഷിതമായും ചലിക്കുന്നതിന് മാത്രമായി റോഡിൽ വെള്ള വരകളാൽ അടയാളപ്പെടുത്തിയിട്ടുള്ള ഭാഗമാണ് ക്യാര്യേജ് വേ എന്നത്.
ഈ മാർക്കു ചെയ്തിരിക്കുന്ന ക്യാരേജ് വേയ്ക്കുള്ളിൽ ഒരു കാരണവശാലും വാഹനങ്ങൾ നിർത്താൻ പാടില്ല. അത്യാവശ്യ ഘട്ടങ്ങളിൽ നിർത്തേണ്ടിവരുകയാണെങ്കിൽ ക്യാര്യേജ് വേയുടെ അതിർത്തി വരയ്ക്ക് പുറമേ അര മീറ്ററെങ്കിലും മാറ്റി മാത്രമേ നിർത്താൻ പാടുള്ളു.
ഒറ്റവരി ക്യാര്യേജ് വേകളിൽ ക്യാര്യേജ് വേയുടെ ഇടതു വശം ചേർന്ന്, മധ്യഭാഗത്തെ വരയിൽ നിന്നും പരമാവധി ദൂരത്തിൽ വാഹനം പൊസിഷൻ ചെയ്ത് മാത്രമേ ഡ്രൈവ് ചെയ്യാൻ പാടുള്ളു.
നമ്മുടെ വാഹനത്തെ മറ്റൊരു വാഹനം മറികടക്കുമ്പോഴും വളവുകളേയോ കയറ്റങ്ങളേയോ അഭിമുഖീകരിക്കുമ്പോഴും മറ്റു കാരണങ്ങളാൽ മുന്നോട്ടുള്ള കാഴ്ച പരിമിതമായിരിക്കുമ്പോഴും നമ്മുടെ വാഹനം പരമാവധി വേഗത കുറച്ച് ഇടതു വശം ചേർന്ന് മാത്രം ഓടിക്കുക.
ഇരട്ട അല്ലെങ്കിൽ കൂടുതൽ ക്യാര്യേജ് വേകൾ ഉള്ള ട്രാഫിക് വേകളിൽ ''ലെയിൻ അച്ചടക്കം" നിർബന്ധമായും പാലിക്കുക.
ലെയിൻ ട്രാഫിക് ഡിസിപ്ലിൻ MV(D) Regulations 2017ലെ ക്ലോസ് 6 പ്രകാരമുള്ള സുരക്ഷാനിർദ്ദേശങ്ങൾ നിർബന്ധമായും പാലിക്കേണ്ടതാണ്.
ഇരട്ട ക്യാര്യേജ് വേ റോഡുകളിൽ ഇടതുവശത്തെ ക്യാര്യേജ് വേയിൽക്കൂടി മാത്രമേ വാഹനങ്ങൾ ഓടിക്കാൻ പാടുള്ളു. വലതു വശത്തെ ട്രാക്ക് ഓവർ ടേക്ക് ചെയ്യുന്നതിനും Ambulance പോലുള്ള എമർജെൻസി വാഹനങ്ങൾക്കും സുഗമമായി കടന്നുപോകുന്നതിന് എപ്പോഴും സ്വതന്ത്രമായി ഒഴിച്ചിട്ടു മാത്രമേ ലെയിൽ ട്രാഫിക്കിൽ വാഹനങ്ങൾ ഓടിക്കാൻ പാടുള്ളു.
ഓവർടേക്ക് ചെയ്യുമ്പോഴും ക്യാര്യേജ് വേ മാറുമ്പോഴും കൃത്യമായി ഇൻഡിക്കേറ്ററുകൾ പ്രവർത്തിപ്പ്ച്ച് മാത്രമേ ഡ്രൈവ് ചെയ്യാൻ പാടുള്ളു.
ലെയിൻ ട്രാഫിക്കിൽ വാഹനങ്ങൾ ഓടിക്കുമ്പോൾ അകത്തേയും പുറത്തേയും റിയർവ്യൂ മിററുകൾ കൃത്യമായി ഉപയോഗിക്കാൻ ശീലിക്കുന്നത് അപകടരഹിത യാത്രകൾക്ക് അത്യാവശ്യമാണ്.
മിററുകളിലെ ബ്ലൈൻഡ് സ്പോട്ടുകളെപ്പറ്റി വ്യക്തമായ ധാരണയോടു കൂടി വേണം ഡ്രൈവ് ചെയ്യേണ്ടത്.
തുടർച്ചയായ പരിശീലനം ശീലങ്ങളാകും
ശീലങ്ങൾ സ്വഭാവവും
സ്വഭാവം ഒരു സംസ്കാരവും ആകും.
നമുക്കൊന്നായി നമ്മുടെ റോഡുകൾ സുഗമവും സുരക്ഷിതവുമാക്കാം...
കേരള മോട്ടോർ വാഹന വകുപ്പ്
ജന നന്മക്ക്... ജന രക്ഷക്ക്...
#mvdkerala